ورطــــــــــــة(1)

خالد : منى … منى . وين شهادة ميلاد عبدالرحمن ؟
منى : بالدرج والصور بعد بالدرج .
خالد : وشهادة التطعيم وينها ؟
منى : يا خالد ـ الله يخليك ـ كلها بالدرج ألي قدامك
خالد : طيب طيب
خرج خالد متوجها إلى إدارة الأحوال المدينة ، ولما وصل دخل مبنى كبير بدأ البحث عن مكان الإضافات ، ولكن تاه وتاه … وأخيرا وصل لقاعة الإضافات ولكن أي شباك هذا أم هذا ، زحام شديد
خالد : لو تكرمت الإضافات عندك ؟
الموظف بغلظة : ما شفت الورقة الي قدامك وش كبرها ، الإضافات . ؟؟
خالد بارتباك : حبيت أتأكد فقط .
الموظف : تبي أكبر من هذا الإعلان ؟
خالد : أبد طال عمرك .
خالد يقدم الأوراق للموظف : الأوراق كاملة ـ طال عمرك ـ ؟.
الموظف أخذ الأوراق ونظر فيها بسرعة : نعم . راجعنا بعد اسبوع .
خالد : بعد أسبوع !! . خير خير ، مشكور .
بعد أسبوع ، ( وفي نفس المكتب )
خالد : السلام عليكم ، صبحك الله بالخير
الموظف : هلا
خالد : لو تكرمت عندي معاملة إضافة ولد ، وموعدي اليوم .
الموظف : وش اسمك ؟
خالد : خالد بن فهد بن علي ال ….
الموظف : تفضل هذا دفتر العائلة ، وقع أول ثم استلمه .
خالد : طيب
خالد : خلاص ؟
الموظف : نعم .
خالد : مشكور ما قصرت .
نظر خالد في دفتر العائلة ، وعلت الدهشة محياه ، التفت مذهولا إلى الموظف
خالد باستغراب شديد : لو تكرمت
الموظف : نعم
خالد : أنا أضفت فقط عبدالرحمن
الموظف : وبعدين ؟
خالد : فيه ولدين عبدالرحمن وحمد !!!!
قرب خالد الدفتر للموظف حتى يمكنه رؤيته
الموظف : وش المشكلة ؟ هذا ولدك الأول حمد والثاني ولدك الثاني عبدالرحمن
خالد ( بتعجب ) : المشكلة أن حمد ما هو ولدي .
الموظف ( بغضب ) : ولد من أجل ؟ ولدي أنا .
خالد وقد بدا عليه الارتباك الشديد : ما أدري ولد من بس ما هو ولدي .
الموظف ( بابتسامة تهكمية ) : هذه ادارة فيها ميزة تعرف وشي ؟
خالد : لا .
الموظف : الشخص إذا أضاف ولد نعطيه الثاني مجانا !! . ( بغضب ) أقولك شفلك واحد فاضي ، أنا مشغول ، لو تكرمت وراك ناس .
ويشير للصف الطويل من المراجعين
خالد :وين مدير الإضافات ؟؟
الموظف : شباك واحد ، شفه هناك .
يتوجه خالد لمدير الإضافات وهو يتمتم بكرم غير مفهوم ، ولما وصل للشباك
خالد : السلام عليكم
مدير الإضافات بابتسامة : وعليكم السلام
خالد : لو تكرمت
مدير الإضافات : سم
خالد : رحم الله والديك أنا أضفت ولد الأسبوع الماضي واليوم جيت أستلم الدفتر لقيت ولدين !!
مدير الإضافات ( باستغراب ) : وشلون !!
خالد : ما ادري .
مدير الإضافات : ورني الدفتر
خالد : تفضل
قدم له الدفتر
مدير الإضافات : ( ابتسامة عريضة ) هذا ولدك عبدالرحمن أضفته قبل أسبوع صح ؟
خالد : نعم
مدير الإضافات : وهذا ولدك حمد أضفته قبل سنة صح ؟
خالد : لا . خطأ . أنا ما عندي إلا ولد واحد فقط هو عبدالرحمن .
مدير الإضافات : يمكنك أضفته والآن نسيت . !!!!
خالد : وشلون أنسى ؟ أنا ما عندي إلا ولد واحد فقط . والولد شيء ينسى ؟.
مدير الإضافات : طيب . من هو أبو حمد ؟؟
خالد : ما أدري ، كيف أعرف ؟
مدير الإضافات ( بتململ ) : إذا أنت أبو حمد ولا تعرف من هو ابو حمد ، وشلون أعرف أنا ؟ ثم يا أخي أحمد الله ، الله رزقك بولدين مرة وحدة ، قل الحمد لله ، هذه نعمة من الله .!!
خالد ( بنفاد صبر ) : وين مدير الإدارة ؟
مدير الإضافات : الدور الثاني على اليسار .
توجه خالد إلى الدور الثاني ، ودخل مكتب المدير فوجد السكرتير.
خالد : ممكن أقابل المدير ؟
السكرتير : ممكن جدا ، تفضل أجلس .
السكرتير : ممكن اخدمك بشىء ؟
خالد : أبي المدير فقط .
السكرتير : خير ، عنده معاملة اذا خلص منها تدخل عليه .
السكرتير بعد عشر دقائق : تفضل .
دخل خالد على المدير ، مكتب كبير نسبيا مرتب ومنظم مكتب المدير في مقابل القادم مباشرة ، وعلى مكتبه تتكدس الأوراق والملفات
خالد : السلام عليكم
المدير : عليكم السلام ، تفضل أجلس يا ولدي .
خالد : مشكور ما تقصر
المدير : تفضل يا ولدي ، وش مشكلتك ، ترى حنا هنا لحل مشكلات المواطنين تفضل .. تفضل .
خالد : رحم الله والديك أنا أضفت ولد الأسبوع الماضي واليوم جيت أستلم الدفتر لقيت ولدين !!
المدير( ابتسامة تعجب ) : هذا كرم حاتمي !! .
خالد : بس …
المدير : عطني الدفتر أشوفه .
خالد : تفضل .
المدير : هذا ولدك عبدالرحمن أضفته قبل أسبوع ، وهذا ولدك حمد أضفته قبل سنة ، وش المشكلة ؟
خالد : صدقني ما كان عندي ولد اسمه حمد أبدا ، وزوجتي ما ولدت إلا مرة وحدة فقط وجابت عبدالرحمن فقط ، وأنا ما تزوجت إلا مرة واحدة فقط .
المدير : طيب ، من هو ابو حمد ؟
خالد : ما أعرف .
المدير : يا ولدي ، المسألة بالعقل ، هل تتصور أن حمد جاء بدون أب ؟
خالد : لا
المدير ( مبتسما ): حسنا ،كن أبا حمد إذا .
خالد : يا استاذ هذا ما هو ولدي
المدير ( وقد بدأ يفقد اعصابه ) : ولد من أجل ، وشلون دخل في دفترك ؟
خالد : ما أعرف ، أقصد هذه هي المشكلة
المدير وقد عاد له هدوءه من جديد وابتسم ابتسامة عريضة : لقيت لك حل ممتاز
خالد : سم
المدير : تروح مستشفى الشميسي ، وتستخرج شهادة وفاة لولدك حمد ، وابشر نساعدك !!!
خالد : شهادة وفاة !! !! .
المدير ( بحيرة ) : ما عندي غير هذا شيء .
خالد : .........

مقول للأمانة

شكريات بس وين الورطات الثنية

تحياتيـ

شيــــــــــكراً على المروووووور

مشكور على القصه

الله يعافيكـ

شيكرا على المرور الدائم